ALCAHOL &HEALTH

കേരളം മദ്യത്തിന്റെ സ്വന്തം നാടായി മാറിയിട്ട് കാലമേറെയായി. മൂന്നുകോടി മുപ്പത്തിനാല് ലക്ഷം ജനസംഖ്യയുള്ള കേരളത്തില് ഒരു കോടിയോളം സ്ഥിരം മദ്യാപാനികളുണ്ടെന്ന് കണക്കാക്കപ്പെടുന്നു. മദ്യപാനത്തിന്റെ ആളോഹരി വിഹിതം കേരളത്തില് 8.3 ലിറ്ററാണ്. ഒരു കൊല്ലം കേരളം കുടിച്ചുതീര്ക്കുന്ന മദ്യത്തിന്റെ അളവ് ഏകദേശം 26 കോടി ലിറ്ററാണ്. കേരളീയര് മദ്യപാനം ആരംഭിക്കുന്ന ശരാശരി പ്രായം 13 വയസ്സാണെന്ന് സര്വേകള് സൂചിപ്പിക്കുന്നു. യുവാക്കള്, വിദ്യാര്ഥികള് എന്നീ വിഭാഗങ്ങള് കടന്ന് മദ്യം സ്ത്രീകളിലേക്കും വ്യാപിച്ചു എന്നതാണ് നടുക്കുന്ന വസ്തുത. മദ്യാസക്തി വൈദ്യശാസ്ത്രപരമായും മനഃശാസ്ത്രപരമായും ചികിത്സ ആവശ്യമുള്ള ഒരു രോഗമാണ്.

മദ്യപാനം-വിവിധ ഘട്ടങ്ങള്
പ്രാഥമിക ഘട്ടം: തുടക്കത്തില് പാര്ട്ടികളിലോ വിനോദയാത്രയിലോ കുടുംബ പരിപാടിയിലോ മദ്യപാനം തുടങ്ങിവെക്കുന്നു. ലഭിക്കുന്ന ലഹരിമൂലം കാലക്രമേണ കഴിക്കുന്ന മദ്യത്തിന്റെ അളവും കഴിക്കുന്ന ദിവസങ്ങളും കൂടിക്കൊണ്ടുവരുന്നു. മാത്രമല്ല, ലഹരി നിലനിര്ത്താന് വ്യക്തിക്ക് കൂടുതല് അളവില് മദ്യപിക്കേണ്ടിവരുന്നു.

മധ്യഘട്ടം: ഈ അവസ്ഥയില് ആത്മനിയന്ത്രണം പാടെ നഷ്ടപ്പെട്ട രോഗി മദ്യപാനത്തെ സ്വയം ന്യായീകരിക്കാന് സാമ്പത്തിക പ്രശ്നങ്ങളാലോ, കുടുംബപ്രശ്നങ്ങളാലോ ആണ് താന് മദ്യപിക്കുന്നതെന്ന് വിശ്വസിക്കാന് ശ്രമിക്കുന്നു. കുടുംബ ബന്ധം തകരല്, ദാമ്പത്യബന്ധം വേര്പെടല്, ജോലി നഷ്ടപ്പെടല്, ശാരീരികാരോഗ്യം കുറയുക തുടങ്ങിയ നിരവധി പ്രശ്നങ്ങളാല് ഇവരുടെ ജീവിതം ദുരിതപൂര്ണമാകുന്നു.

അവസാനഘട്ടം: ഈ ഘട്ടത്തില് രോഗി ശാരീരികമായും മാനസികമായും പാടേ നശിക്കുന്നു. സ്ഥലകാലബോധം നഷ്ടപ്പെട്ട അവസ്ഥയില്, മദ്യപിക്കാന് വേണ്ടി കടം വാങ്ങുക, നുണ പറയുക, കളവ് നടത്തുക എന്നിവ സ്വഭാവത്തിന്റെ ഭാഗമായി തീരുന്നു. കുടി നിര്ത്തുമ്പോള് ഉണ്ടാകുന്ന ശാരീരിക, മാനസിക ബുദ്ധിമുട്ടുകള് കാരണം മദ്യം ഉപേക്ഷിക്കുക ഇവര്ക്ക് ബുദ്ധിമുട്ടായിത്തീരുന്നു.

ആരോഗ്യപ്രശ്നങ്ങള്
കുറച്ചു സമയത്തേക്ക് അനുഭവപ്പെടുന്ന സുഖകരമായ അവസ്ഥ കഴിഞ്ഞാല് തലച്ചോറിന്റെ പ്രവര്ത്തനം മന്ദീഭവിക്കുകയും ഏകാഗ്രത കുറയുകയും ചിന്ത പതുക്കെയാവുകയും ചുറ്റുപാടുകളോട് പ്രതികരിക്കാന് കൂടുതല് സമയം വേണ്ടിവരികയും ചെയ്യുന്നു. പേശീനിയന്ത്രണം കുറയുകയും സംസാരത്തിന് കുഴച്ചില് ഉണ്ടാവുകയും നടത്തത്തിനും ചലനത്തിനും നിയന്ത്രണമില്ലാതാവുകയും ചെയ്യുന്നു.

മദ്യം ആമാശയത്തിന്റെയും കുടലിന്റെയും സങ്കോചവികാസങ്ങള് തടസ്സപ്പെടുത്തുകയും ഈ ഭാഗങ്ങളിലെ സംരക്ഷണ കവചങ്ങളെ നശിപ്പിക്കുകയും ചെയ്യുന്നതുകൊണ്ട് കുടലില് പുണ്ണ്, ചെറുകുടലിലെ വ്രണങ്ങള് വികസിച്ച് ദ്വാരമുണ്ടാകുന്ന അവസ്ഥ എന്നിവ ഉണ്ടാകാം.
മദ്യം കരളിനെ ബാധിക്കുന്ന വിഷമാണ്. തുടക്കത്തില് കരളില് കൊഴുപ്പ് അടിഞ്ഞുകൂടി ഉണ്ടാകുന്ന ഫാറ്റിലിവറും പിന്നീട് മദ്യപാനം തുടര്ന്നാല് കരള്വീക്കം, മഹോദരം എന്നീ അവസ്ഥകളും ഉണ്ടാകുന്നു.
ഫോളിക് ആസിഡ് എന്ന വിറ്റമിന്റെ കുറവുകാരണം വിളര്ച്ച, മുറിവില് രക്തം കട്ടപിടിക്കാന് സഹായിക്കുന്ന പ്ലേറ്റ്ലെറ്റുകളുടെ കുറവുകാരണം രക്തം വാര്ന്നുപോകുക എന്നിവയും മദ്യപരില് കൂടുതലാണ്. രോഗപ്രതിരോധശേഷി കുറവായതിനാല് അണുബാധകള് ഉണ്ടാകുന്നു. മദ്യപിച്ച് ബോധമില്ലാത്ത അവസ്ഥയില് ഛര്ദിച്ചാല്, ഛര്ദില് ശ്വാസകോശത്തിലെത്തി ഉണ്ടാകുന്ന ആസ്പിരേഷന് ന്യുമോണിയ, ക്ഷയരോഗം എന്നിവയും മദ്യപരില് കൂടുതലാണ്. പേശികളുടെ ബലക്കുറവ്, പേശികള് ഭാഗികമായി നശിക്കുന്ന മയോപ്പതി, എല്ലുകളുടെ തേയ്മാനം, ബലക്കുറവ്, സോറിയാസിസ്പോലുള്ള ത്വക് രോഗങ്ങള് എന്നിവയും ഇവരില് കണ്ടുവരുന്നു. മദ്യം ലൈംഗികശേഷി വര്ധിപ്പിക്കുമെന്നാണ് പൊതുവായ ധാരണയെങ്കിലും ഫലത്തില് അത് ലൈംഗികശേഷി കുറയ്ക്കുകയാണ് ചെയ്യുന്നത്.

തലച്ചോറിനും ഞരമ്പിനുമുണ്ടാകുന്ന തകരാറുകള്: തുടര്ച്ചയായ മദ്യപാനം തലച്ചോറിന്റെ വലിപ്പം കുറയ്ക്കുന്നതോടൊപ്പം ഓര്മക്കുറവും ചിന്തയില് മാന്ദ്യവും ഉണ്ടാക്കുന്നു. മദ്യപാനംമൂലം ഉണ്ടാകുന്ന പോഷകാഹാരക്കുറവ് വെര്ണിക്കീസ് എന്സഫലോപതി, കോര്സകോഫ് സൈക്കോസിസ് എന്നീ ഗുരുതരമായ രോഗങ്ങളും ഉണ്ടാക്കാം. സ്ഥിരമായി മദ്യം കഴിക്കുന്നവര് മദ്യം നിര്ത്തുകയോ അളവ് കുറയ്ക്കുകയോ ചെയ്താല് 48 മണിക്കൂറിനുള്ളില് അപസ്മാരവും പേടിപ്പിക്കുന്നതോ കുറ്റപ്പെടുത്തുന്നതോ ആയ അശരീരി ശബ്ദങ്ങളും ഉണ്ടാകാന് സാധ്യതയുണ്ട്.

മാനസിക രോഗങ്ങള്: പല മാനസിക രോഗങ്ങളും മദ്യപിക്കുന്നവരില് കൂടുതലായി കണ്ടുവരുന്നു. വിഷാദരോഗം മദ്യപരില് സാധാരണമാണ്. മദ്യപരില് ആത്മഹത്യാനിരക്ക് 15 ശതമാനം ആണ്. പങ്കാളിയുടെ ചാരിത്ര്യം സംശയിക്കുന്ന ഡെലൂഷന് ഓഫ് ഇന്ഫെഡിലിറ്റി എന്ന രോഗവും ഇവരില് കൂടുതലാണ്.

ചികിത്സയുടെ ഘട്ടങ്ങള്
രോഗത്തെ വിലയിരുത്തല്: മദ്യപാനശീലത്തെ വിശദമായി മനസ്സിലാക്കുകയാണ് ആദ്യപടി. മദ്യപാനശീലത്തിന്റെ കാലയളവ്, കഴിക്കുന്ന അളവ്, കഴിക്കാനുള്ള കാരണങ്ങള്, മാനസിക, ശാരീരിക, കുടുംബ, സാമൂഹിക പ്രശ്നങ്ങള്, സാമ്പത്തിക, സാമൂഹിക പിന്തുണ എന്നിവയെക്കുറിച്ച് മനസ്സിലാക്കിയിട്ടേ ചികിത്സ ആരംഭിക്കാവൂ.

വിഷമുക്തി ചികിത്സ: മദ്യപാനം നിര്ത്തുമ്പോള് ഉണ്ടാകുന്ന വിഷമതകളെ തടയുകയാണ് ഈ ഘട്ടത്തില് ചെയ്യുന്നത്. ശാരീരികമായ വൈഷമ്യങ്ങള് ഉണ്ടാകാതിരിക്കാനും മദ്യം കഴിക്കാനുള്ള പ്രേരണ ഇല്ലാതാക്കാനും രോഗിയെ ആസ്പത്രിയില് പ്രവേശിപ്പിച്ച് ചികിത്സ നല്കുന്നു. തയാമിന് വൈറ്റമിന്, ക്ലോര് ഡയാസിപോക്സൈഡ് എന്നീ മരുന്നുകളാണ് ഈ ഘട്ടത്തില് ചികിത്സയ്ക്കായി ഉപയോഗിക്കുന്നത്.

തുടര് ചികിത്സ: വീണ്ടും മദ്യപാനം ആരംഭിക്കുന്നത് ഒഴിവാക്കുക, കുടുംബവും ജീവിതപങ്കാളിയും സമൂഹവുമായി ഇണങ്ങി ജീവിക്കാന് പ്രേരിപ്പിക്കുക, പുനരധിവാസം, ജീവിത നിലവാരം ഉയര്ത്തല് എന്നിവയാണ് ഈ ഘട്ടത്തിലെ ദീര്ഘകാല ലക്ഷ്യങ്ങള്. സൈക്യാട്രിസ്റ്റ്, സൈക്കോളജിസ്റ്റ്, സൈക്യാട്രിക് സോഷ്യല്വര്ക്കര് എന്നിവരടങ്ങിയ ഒരു വിദഗ്ധ ടീമിന്റെ മരുന്നുകളും കൗണ്സലിങ്ങും മൂലം ഈ ലക്ഷ്യങ്ങള് നേടിയെടുക്കാവുന്നതാണ്.